അല്‍ കഹ്ഫ് – സൂക്തങ്ങള്‍: 97 – 99

فَمَا اسْطَاعُوا أَن يَظْهَرُوهُ وَمَا اسْتَطَاعُوا لَهُ نَقْبًا ﴿٩٧﴾ قَالَ هَٰذَا رَحْمَةٌ مِّن رَّبِّيۖ فَإِذَا جَاءَ وَعْدُ رَبِّي جَعَلَهُ دَكَّاءَۖ وَكَانَ وَعْدُ رَبِّي حَقًّا ﴿٩٨﴾ ۞ وَتَرَكْنَا بَعْضَهُمْ يَوْمَئِذٍۢ يَمُوجُ فِى بَعْضٍۢ ۖ وَنُفِخَ فِى ٱلصُّورِ فَجَمَعْنَٰهُمْ جَمْعًۭا﴿٩٩﴾


(97) യഅ്ജൂജ് -മഅ്ജൂജുകള്‍ക്ക് കയറി കടന്നു വരാന്‍ കഴിയാത്തവണ്ണം ഭദ്രമായിരുന്നു ഈ ഭിത്തി. അതില്‍ തുരങ്കമുണ്ടാക്കാനും അവര്‍ക്ക് കഴിഞ്ഞില്ല.

(98) ദുല്‍ഖര്‍നൈന്‍ പറഞ്ഞു: ‘ഇത് എന്റെ റബ്ബിന്റെ കാരുണ്യമാകുന്നു. എന്നാല്‍, എന്റെ റബ്ബിന്റെ വാഗ്ദത്തസമയമെത്തുമ്പോള്‍ അവന്‍ അതിനെ തകര്‍ത്ത് നിരപ്പാക്കിക്കളയും. എന്റെ റബ്ബിന്റെ വാഗ്ദത്തം എത്രയും സത്യമായതല്ലോ.’

(99) അന്നാളില്‍ ജനത്തെ നാം തിരമാലകള്‍പോലെ മേല്‍ക്കുമേല്‍ ഇരമ്പിക്കയറുന്നവരായി വിടുന്നതാകുന്നു. കാഹളം ഊതപ്പെടും. അപ്പോള്‍ നാം സകല മര്‍ത്ത്യരെയും ഒറ്റ സംഘമായി ഒരുമിച്ചുകൂട്ടും.

(98) എന്നെ സംബന്ധിച്ചിടത്തോളം സാധ്യമാകാവുന്നത്ര ബലിഷ്ഠവും സുഭദ്രവുമായ ഭിത്തിയാണ് ഞാന്‍ നിര്‍മിച്ചിട്ടുള്ളതെങ്കിലും അത് അനശ്വരമല്ല എന്നര്‍ഥം. അല്ലാഹുവിന്റെ അഭീഷ്ടമുള്ളേടത്തോളം അത് നിലനില്‍ക്കും. അല്ലാഹു നിശ്ചയിച്ച സമയം വന്നുകഴിഞ്ഞാലോ, തകര്‍ന്നു തുണ്ടം തുണ്ടമാകുന്നതില്‍ നിന്ന് അതിനെ രക്ഷിക്കാന്‍ ഒരു ശക്തിക്കും സാധ്യമാകുകയില്ല. ”വാഗ്ദത്ത സമയം” എന്നതിന് രണ്ടര്‍ത്ഥമുണ്ട്. ഈ മതിലിടിയുന്ന കാലം എന്ന് അതുകൊണ്ടുദ്ദേശിക്കാം. സമസ്ത വസ്തുക്കളുടെ നാശത്തിനും മരണത്തിനും അല്ലാഹു നിശ്ചയിച്ച കാലവും അതുകൊണ്ടുദ്ദേശിക്കാം. അതായത്, ഖിയാമത്ത് നാള്‍! ദുല്‍ഖര്‍നൈനിയുടെ കഥ ഇവിടെ അവസാനിക്കുന്നു. മക്കയിലെ അവിശ്വാസികളുടെ പരീക്ഷണാര്‍ഥമുള്ള ചോദ്യത്തിനുത്തരമായി വിവരിച്ചതാണിത്. എങ്കിലും, ഗുഹാവാസികളുടെ കഥപോലെയും മൂസാ-ഖദിര്‍ സംഭവം പോലെയും ഖുര്‍ആന്‍ അതിന്റെ സമ്പ്രദായമനുസരിച്ച് ഈ കഥയും പ്രയോജനപ്പെടുത്തിയിട്ടുണ്ട്. ഏതൊരു മഹാനുഭാവന്റെ ഔന്നത്യത്തെപ്പറ്റി ബഹുദൈവാരാധകരായ നിങ്ങള്‍ വേദക്കാരില്‍നിന്ന് കേട്ടുകൊണ്ടിരുന്നുവോ ആ ദുല്‍ഖര്‍നൈനി വെറുമൊരു ലോകജേതാവായിരുന്നില്ല; ഏകദൈവത്വത്തിന്റെയും പരലോകവിശ്വാസത്തിന്റെയും വക്താവായിരുന്നു അദ്ദേഹം. നീതിയുടേയും നിഷ്പക്ഷതയുടേയും വിശാലമനസ്‌കതയുടേയും തത്ത്വങ്ങള്‍ അദ്ദേഹം ഉയര്‍ത്തിപ്പിടിച്ചു. നിങ്ങളോ, ചെറിയൊരു സ്ഥാനം കിട്ടിയാല്‍ ലോകം മുഴുവന്‍ താനാണെന്ന ഭാവം നടിച്ച് ഹ്രസ്വമാനസരായി തീരുന്നു; എന്നെല്ലാമാണ് ഖുര്‍ആന്‍ ഈ കഥയിലൂടെ ഉണര്‍ത്തുന്നത്. ദുല്‍ഖര്‍നൈനി നിര്‍മ്മിച്ച ഭിത്തിയെ സംബന്ധിച്ച കൂടുതല്‍ വിവരം ഇങ്ങനെ മനസ്സിലാക്കാം: ദുല്‍ഖര്‍നൈന്‍ നിര്‍മിച്ച ഭിത്തി പ്രസിദ്ധമായ ചൈനാ ഭിത്തിയാണെന്ന ഒരു തെറ്റിദ്ധാരണ ചിലര്‍ക്കുണ്ട്. എന്നാല്‍, കോക്കസ് പ്രാന്തത്തിലെ ദാഗിസ്താനില്‍, ദര്‍ബന്‍ദിന്റെയും ദാരിയലിന്റെയും മധ്യത്തിലാണ് ഈ ഭിത്തി സ്ഥിതിചെയ്യുന്നത്. കരിങ്കടലിനും കാസ്പിയന്‍ സമുദ്രത്തിന്നുമിടക്കാണ് കോക്കസ് പ്രദേശം. അവിടെ കരിങ്കടല്‍ മുതല്‍ ദാരിയല്‍വരെ ഉയര്‍ന്ന പര്‍വതനിരകളാണ്. മധ്യത്തിലെ മലയിടുക്കുകളാകട്ടെ, ഒരു വലിയ സൈനികസംഘത്തിന് കടന്നുവരാന്‍ മാത്രം വീതിയുള്ളതായിരുന്നില്ല. എന്നാല്‍, ദാരിയലിനും ദര്‍ബന്‍ദിനുമിടയിലുള്ള പ്രദേശത്തെ പര്‍വതങ്ങള്‍ അധികം ഉയരം കൂടിയതല്ലായിരുന്നു. ഇവിടത്തെ മലമ്പാതകള്‍ നല്ലപോലെ വീതിയുള്ളതുമാണ്. പുരാതനകാലത്ത് വടക്കുനിന്നുള്ള അപരിഷ്‌കൃത ജനവര്‍ഗങ്ങളുടെ കൊള്ളസംഘങ്ങള്‍ ഈ വഴിയിലൂടെ ദക്ഷിണ ഭാഗങ്ങളില്‍ കടന്നാക്രമണം നടത്തുക പതിവായിരുന്നു. വടക്കുനിന്ന്, ഇതേ മാര്‍ഗത്തിലൂടെയുള്ള ആക്രമണങ്ങളെയാണ് പേര്‍ഷ്യന്‍ ഭരണാധികാരികള്‍ ഭയപ്പെട്ടിരുന്നതും. ഈ ആക്രമണങ്ങളുടെ പ്രതിരോധാര്‍ഥം അവിടെ സുഭദ്രമായൊരു പടുകൂറ്റന്‍ ഭിത്തി നിര്‍മിക്കപ്പെട്ടു. 50 നാഴിക നീളവും 29 അടി ഉയരവും 10 അടി വീതിയുമുള്ള ഈ ഭിത്തി ആര്‍, എപ്പോള്‍ നിര്‍മിച്ചുവെന്ന് ഇതുവരെ ചരിത്രപരമായി തെളിയിക്കപ്പെട്ടിട്ടില്ല. എന്നാല്‍, മുസ്‌ലിം ചരിത്രപണ്ഡിതന്മാരും ഭൂമിശാസ്ത്രകാരന്മാരും ഇതുതന്നെയാണ് ‘ദുല്‍ഖര്‍നൈന്‍ഭിത്തി’ എന്നു വിശ്വസിക്കുന്നു. അതിന്റെ നിര്‍മാണരീതികളെക്കുറിച്ച ഖുര്‍ആനിക വിവരണങ്ങളുമായി യോജിക്കുന്ന അടയാളങ്ങള്‍ ഇപ്പോഴും അവിടെ കാണപ്പെടുന്നുണ്ട്. ഇബ്‌നുജരീര്‍ അത്ത്വബരിയും ഇബ്‌നുകസീറും ഇതെപ്പറ്റി തങ്ങളുടെ ചരിത്രകൃതികളില്‍ രേഖപ്പെടുത്തിയിരിക്കുന്നു. ‘മുഅ്ജമുല്‍ ബുല്‍ദാനി’ല്‍ യാഖൂത്ത് അതുദ്ധരിച്ച് എഴുതുന്നു: അദര്‍ബൈജാന്‍ വിജയാനന്തരം ഹദ്‌റത്ത് ഉമര്‍(റ) ഹിജ്‌റ 22-ആം വര്‍ഷം സുറാഖത്തുബ്‌നു അംറിനെ ബാബുല്‍ അബ്‌വാബ് കീഴടക്കാന്‍ നിയോഗിച്ചു. അബ്ദുര്‍റഹ്മാനിബ്‌നു റബീഅയുടെ നേതൃത്വത്തില്‍ സുറാഖ തന്റെ മുന്നണിപ്പടയെ അങ്ങോട്ടയച്ചു. അബ്ദുര്‍റഹ്മാന്‍, അര്‍മീനിയന്‍ പ്രദേശങ്ങളില്‍ പ്രവേശിച്ചപ്പോള്‍ അവിടത്തെ ഭരണാധികാരിയായിരുന്ന ശഹര്‍ബറാസ്, യുദ്ധം കൂടാതെ കീഴടങ്ങി. അനന്തരം ബാബുല്‍ അബ്‌വാബിലേക്ക് മുന്നേറാന്‍ തുടങ്ങവെ, അബ്ദുര്‍റഹ്മാനോട് ശഹര്‍ബറാസ് പറഞ്ഞു: ‘ദുല്‍ഖര്‍നൈന്‍ ഭിത്തി നിരീക്ഷിച്ച് ആ പ്രദേശങ്ങളിലെ സ്ഥിതിഗതികള്‍ പഠിച്ചുവരാന്‍ ഞാന്‍ ഒരു ദൂതനെ അയച്ചിട്ടുണ്ടായിരുന്നു. അദ്ദേഹം വിശദവിവരങ്ങള്‍ താങ്കളെ ബോധിപ്പിക്കുന്നതാണ്.’ അങ്ങനെ അബ്ദുര്‍റഹ്മാന്റെ മുമ്പില്‍ അദ്ദേഹം ഹാജറാക്കപ്പെട്ടു. ഈ സംഭവം നടന്ന് 200 വര്‍ഷങ്ങള്‍ക്കു ശേഷം അബ്ബാസി ഖലീഫയായിരുന്ന അല്‍വാസിഖ് ദുല്‍ഖര്‍നൈന്‍ ഭിത്തിയുടെ നിരീക്ഷണാര്‍ഥം സലാമുത്തര്‍ജുമാന്റെ നേതൃത്വത്തില്‍ 50 പേരുടെ ഒരു സംഘത്തെ നിയോഗിക്കുകയുണ്ടായി. ‘മുഅ്ജമുല്‍ ബുല്‍ദാനി’ല്‍ യാഖൂത്തും, ‘അല്‍ബിദായ വന്നിഹായയി’ല്‍ ഇബ്‌നുകസീറും സാമാന്യം വിശദമായി ഇത് പ്രതിപാദിക്കുന്നുണ്ട്. അവരുടെ വിവരണപ്രകാരം പ്രസ്തുത ദൗത്യസംഘം ആദ്യം സാമര്‍റയിലൂടെ തിഫ്‌ലീസിലും അവിടന്ന് അസ്സറീറിലും തുടര്‍ന്ന് അല്ലാന്‍ വഴി ഫീലാന്‍ഷായിലും എത്തി. പിന്നീട് കാസ്പിയന്‍ ദേശത്ത് പ്രവേശിച്ചു. തുടര്‍ന്ന് ദര്‍ബന്‍ദില്‍ ചെന്ന് ഭിത്തിനിരീക്ഷണം നടത്തി. കോക്കസിലെ ഈ ഭിത്തിതന്നെയാണ് ദുല്‍ഖര്‍നൈന്‍ ഭിത്തിയെന്ന് ഹിജ്‌റ മൂന്നാം ശതകത്തിലും മുസ്‌ലിംകള്‍ പൊതുവെ വിശ്വസിച്ചിരുന്നതായി ഇത് വ്യക്തമാക്കുന്നു. ‘മുഅ്ജമുല്‍ ബുല്‍ദാനി’ല്‍ മറ്റിടങ്ങളിലും ഈ വസ്തുത യാഖൂത്ത് പരാമര്‍ശിക്കുന്നു. കാസ്പിയന്‍ എന്ന ശീര്‍ഷകത്തില്‍ അദ്ദേഹം എഴുതുന്നു. ദുല്‍ഖര്‍നൈന്‍ ഭിത്തിക്ക് സമീപം ദര്‍ബന്‍ദ് എന്നറിയപ്പെടുന്ന ബാബുല്‍ അബ്‌വാബിന്റെ പിന്നിലെ തുര്‍ക്കി പ്രദേശങ്ങളാണിത്. കാസ്പിയന്‍ രാഷ്ട്രത്തെപ്പറ്റി വിശദമായി വിവരിക്കുന്ന ഖലീഫ മുഖ്തദിര്‍ ബില്ലാഹിയുടെ അംബാസഡര്‍ അഹ്മദുബ്‌നു ഫദ്‌ലാന്റെ ഒരു റിപ്പോര്‍ട്ടും അദ്ദേഹം ഉദ്ധരിക്കുന്നുണ്ട്. ഉതല്‍ ആസ്ഥാനമായുള്ള രാജ്യമാണ് കാസ്പിയന്‍ എന്നതില്‍ പറയുന്നു. ഈ പട്ടണത്തിന്റെ മധ്യത്തിലൂടെ കടന്നുപോവുന്ന ഉതല്‍ നദി റഷ്യയില്‍നിന്നും ബള്‍ഗേറിയയില്‍നിന്നും ആഗമിച്ച് കാസ്പിയന്‍ സമുദ്രത്തില്‍ ചേരുന്നു. വോള്‍ഗ എന്ന പേരിലാണ് ഈ നദി ഇപ്പോള്‍ അറിയപ്പെടുന്നത്. ‘ബാബുല്‍ അബ്‌വാബ്’ എന്ന ശീര്‍ഷകത്തില്‍ അദ്ദേഹം എഴുതുന്നു: ”ഇതിന് അല്‍ബാബ് എന്നും ദര്‍ബന്‍ദ് എന്നും പേരുണ്ട്. കാസ്പിയന്‍ കടല്‍ത്തീരത്ത് സ്ഥിതിചെയ്യുന്ന അമുസ്‌ലിം നാടുകളില്‍നിന്ന് മുസ്‌ലിം നാടുകളിലേക്ക് വരുന്നവരെസ്സംബന്ധിച്ചിടത്തോളം വളരെ ദുഷ്‌കരമാണ് ഈ മാര്‍ഗം. ഒരു കാലത്തിത് അനൂശര്‍വാന്റെ സാമ്രാജ്യത്തില്‍പെട്ടതായിരുന്നു. പേര്‍ഷ്യന്‍ ചക്രവര്‍ത്തിമാര്‍ ഈ അതിര്‍ത്തി പ്രദേശത്തിന്റെ സംരക്ഷണത്തിന് വലിയ പ്രാധാന്യം കല്‍പിച്ചിരുന്നു.”

(99) ‘അന്നാള്‍’ എന്നത് കൊണ്ടുദ്ദേശം പുനരുത്ഥാന ദിവസമാണ്. ഖിയാമത്ത് നാളിനെക്കുറിച്ച ദൈവികനിശ്ചയത്തെ സൂചിപ്പിച്ചുകൊണ്ടുള്ള ദുല്‍ഖര്‍നൈനിയുടെ പരാമര്‍ശത്തോട് ബന്ധപ്പെടുത്തി, അതിന്റെ തുടര്‍ച്ചയെന്നോണമാണ് വാക്യം അരുള്‍ ചെയ്തിരിക്കുന്നത്.

പിന്നെ അവര്‍ക്ക് സാധിച്ചില്ല = فَمَا اسْطَاعُوا
അതിനെ കയറി മറിയാന്‍ = أَن يَظْهَرُوهُ
അവര്‍ക്കു സാധിച്ചതുമില്ല = وَمَا اسْتَطَاعُوا
അതില്‍ = لَهُ
തുളയുണ്ടാക്കാന്‍ = نَقْبًا
അദ്ദേഹം (ദുല്‍ ഖര്‍നൈന്‍) പറഞ്ഞു = قَالَ
ഇത് = هَٰذَا
അനുഗ്രഹമാകുന്നു = رَحْمَةٌ
എന്റെ നാഥന്റെ പക്കല്‍നിന്നുള്ള = مِّن رَّبِّيۖ
ഇനി വന്നെത്തിയാല്‍ = فَإِذَا جَاءَ
വാഗ്ദാനം = وَعْدُ
എന്റെ നാഥന്റെ = رَبِّي
അതിനെ അവന്‍ ആക്കും = جَعَلَهُ
തകര്‍ന്നു നിരപ്പായത് = دَكَّاءَۖ
ആയിരിക്കുന്നതാണ് = وَكَانَ
വാഗ്ദാനം = وَعْدُ
എന്റെ നാഥന്റെ = رَبِّي
യാഥാര്‍ഥ്യമാകുന്നു = حَقًّا
നാം വിട്ടു = وَتَرَكْنَا
അവരില്‍ ചിലരെ = بَعْضَهُمْ
അന്നാളില്‍ = يَوْمَئِذٍ
അലയടിക്കുന്നതായി = يَمُوجُ
മറ്റു ചിലരില്‍ = فِي بَعْضٍۖ
ഊതപ്പെടുന്നതാണ് = وَنُفِخَ
കാഹളത്തില്‍ = فِي الصُّورِ
അപ്പോള്‍ അവരെ നാം ഒരുമിച്ച് കൂട്ടും = فَجَمَعْنَاهُمْ
ഒരുമിച്ച് കൂട്ടല്‍ = جَمْعًا

Add comment

Your email address will not be published. Required fields are marked *